Ардын Засгийн газар 1921 оны 10-р сард гаалийн дүрмийг батлан гаргаж, ачаа тээвэрлэлт зохих журамд орсон байна.1922 оны эцэст Д.Сүхбаатар жанжны санаачилгаар Цэргийн яамны дэргэд авто гараашийг 10 машинтайгаар байгуулж, нэмж худалдан авах хөрөнгө олгожээ. 1924 онд шинээр байгуулагдсан Аж ахуйн яам болон Харилцан туслалцах хоршоо зэрэг байгууллагууд цөөхөн автомашинтай болж ойр зуурын тээвэр хийж, Ардын Засгийн газрын шийдвэрээр 1924 онд "Уурын тэргэдийг товчоолон бүртгэх газар"-ыг байгуулж түүнчлэн 1925 оны 7-р сарын 15-ны өдөр "Монгол Улсын Тээх нэвтрүүлэх газар"-ыг байгуулж,  энэхүү өдрийг Монгол Улсад автотээврийн салбар үүссэн өдөр хэмээн үзэж тэмдэглэдэг. 

1925 оны 9-р сард Жанчхүү хотод гурван этгээдийн хэлэлцээ хийж "Автомашины хоршоо" байгуулах хэлэлцээрт гарын үсэг зуржээ.

1924 - 1925 онд Улаанбаатар, Жанчхүү хотод бие даасан 33 авто гараашийг нэгтгэн "Автосиндикат" гэгч байгууллага байгуулж тээвэр хийж байв. 1926 онд "Тээх нэвтрүүлэх газар"-ын дүрмийг батлан гаргаж, шатахуун хадгалах 14-15 тонны багтаамжтай 230 савыг Герман улсаас авчирч Улаанбаатар хотод суурилуулсан нь шатахуун түгээх анхны станц болжээ. Улмаар ЗХУ-аас Нефть бүтээгдэхүүнийг авч эхэлжээ.

Энэ үед Тээх нэвтрүүлэх газар 50 гаруй автомашинтай нийт 180 ажилтантай байжээ. Мөн 1925 онд тээсэн ачаа 0.4 мянган тонн байсан бол 1929 онд 1.2 мянган тонн ачаа тээж гүйцэтгэсэн ажлын хэмжээ 2-3 дахин нэмэгдэн тээвэрлэлтийн дундаж зай нь 700-750 км болсон байгаа нь алсын тээвэрлэлтийг илүү гүйцэтгэсэн байна. Монголын тээх нэвтрүүлэх газар ачаа барааг илүү тээвэрлэж байсны зэрэгцээ шуудан тээвэрт явж морин өртөөг автомашинаар солих эхлэлийг тавьсан гэж үздэг.

Монгол Улсын нийтийн тээврийн салбарын анхны гэх тодотголтой автобусны тухай баримтыг Mercedes-Benz компанийн архивд хадгалагддаг байна. Тэрхүү архивын баримтад:

“1930 оны 3-р сард "Монгол Транс" нэгдэл нийтийн тээврийн үйлчилгээгээ эхлүүлэх зорилгоор таван ширхэг Mercedes-Benz автобус худалдан авсан. Энэ үйл явдлыг нотлох мэдээлэл 1931 онд Берлинд зохион байгуулагдсан Германы автомашины үзэсгэлэнгийн сонины VII хуудсанд Монгол руу экспортолсон автобусны шассигийн зураг нийтлэгдэж байжээ. Тус зургийн тайлбарт “Мерседес-Бенцийн автобуснууд Монголын цаг агаар, орчинд зориулан үйлдвэрлэсэн, цөлийн нөхцөлд ч найдвартай ажиллагаатай байх зориулалттай” гэж бичиж үлдээжээ.