Ц.Цогбадрах: Аавынхаа мэргэжлийг өвлөн хүнийг хүссэн газар нь хүргэдэг ажлаараа би бахархдаг

Нийслэлийн Засаг даргын Тамгын газраас нийтийн тээврийн салбарын парк шинэчлэлтийг эхлүүлж, жолооч нарын нийгмийн асуудалд онцгой анхаарснаар жолоочоор ажиллах хүний тоо эрс нэмэгдэн ажиллах хүчний хомсдолгүй болсон. Үүнээс улбаалж Нийтийн тээврийн салбарт үйл ажиллагаа явуулдаг 18 аж ахуйн нэгжийн жолооч нарын харилцаа хандлага өөрчлөгдөж буй талаар зорчигчдоос талархал ирүүлж, ажлаа хийж буй тэдэнд ч урам зориг өгдөг болоод удаж байна.

Ажилдаа сэтгэл зүрхээ зориулан ажилладаг жолооч болон аюулгүй ажиллагааг ханган ажилладаг инженер техникийн ажилтнуудаа бид алдаршуулж эхэлсэн. Энэ удаа “Зорчигч тээвэр 5” ОНӨААТҮГ-ын жолооч Ц.Цогбадрахыг бид онцолж байна. Ажлаа хийх явцдаа хүний алтан амь аварсан түүнтэй бид ярилцлаа.